चितवन,असोज ३० – विदेशिएका मनकारी नेपालीले बेसहारा बनेकी महिलालाई घर बनाइदिएका छन् । जङ्गली हात्तीले घर भत्काइदिएपछि बेसहारा बनेकी उदयपुरकी ७६ वर्षीया एकल वृद्धालाई कतारमा रहेका उदयपुरका युवाहरूले आर्थिक सहयोग जुटाएर घर बनाइदिएका हुन् ।
त्रियुगा नगरपालिका–७ तिलबारीकी दलमाया रिखाम मगरको गत माघमा जङ्गली हात्तीले घर भत्काइदिएको थियो । घरविहीन बन्नुभएकी दलमायाका लागि प्रवासी सेवा समाज कतार उदयपुरले आर्थिक सहयोग सङ्कलन गरेर घर बनाइदिए पछि उहाँ दङ्ग पर्नुभएको छ ।
प्रवासी सेवा समाज कतार उदयपुरका महासचिव सञ्जीप कटुवालका अनुसार कतारमा वैदेशिक रोजगारीमा रहेका उदयपुरका युवाहरूबाट रु दुई लाख सङ्कलन गरी जस्ताको छाना भएको घर निर्माण गरिदिएका हुन् । सङ्कलन गरिएको रकमबाट आवश्यक निर्माण सामग्री खरिद गरिएको थियो भने स्थानीयवासीले काठपात, ढुङ्गा, गिट्टी र बालुवा सहयोग गरेका थिए । “कतारमा रहेका उदयपुरे युवाहरूबाट रु दुई लाख सङ्कलन गयौँ । त्यसबाट आवश्यक निर्माण सामग्री किन्यौँ । स्थानीयवासीले पनि सामग्री सहयोग गर्नुभयो ।
सबैको सहयोगमा घर निर्माण गरेर हस्तान्तरण गर्न सफल भएका छौँ,” कटुवालले भन्नुभयो । दलमायाले १५ वर्षअघि श्रीमान् गुमाउनुभएको थियो । उहाँका एक छोरा भए पनि उहाँ काठमाडौँमा मजदुरी गर्दै आएका छन् । एक्लै बस्दै आउनुभएकी दलमायाको दैनिकी एकल महिला भत्ताको रकम र आफन्तको सहयोगमा चल्दै आएको छ ।
आर्थिक अभावबीच जीवन गुजार्दै आएकी उनलाई जङ्गली हात्तीले पुरानो घरसमेत भत्काइदिएपछि बसोबासको थप समस्या परेको थियो । समाजका पूर्वअध्यक्ष होमबहादुर बस्नेतका अनुसार दलमायाको पुरानो घर थाकल र माटोले बनेको फुसको घर थियो । हात्तीले घर भत्काएपछि उनलाई सुरक्षित आवासको आवश्यकता महसुस गरी संस्थाको पहलमा नयाँ घर निर्माण गरिएको हो । नयाँ घर पाएपछि दलमाया पनि खुसी भएकी छन् । अभावबीच जीवन बिताउँदै आएकी उनले अब सुरक्षित घरमा दसैँ मनाउन पाउनुभएको छ । “एकल महिला भत्ता र आफन्तको सहयोगमा खाद्यान्नको जोहो गर्दै आएकी छु । अब नयाँ घरमा दसैँ मनाउने छु,” खुसी हुँदै दलमायाले भन्नुभयो ।रासस