काठमाडौं ।
अमेरिकाको टेनेसी राज्यमा मृत्युदण्ड पाएकी क्रिस्टा पाइकलाई दुई पटक घातक इन्जेक्सन दिइए पनि उनको मुटुको धड्कन नरोकिएपछि मृत्युदण्ड प्रक्रिया रोकिएको छ ।
घातक इन्जेक्सन दिने क्रममा समस्या देखिएपछि पाइकका वकिलहरूले उनको मृत्युदण्ड रोक्न र तत्काल उपचार उपलब्ध गराउन माग गर्दै अदालतमा निवेदन दिएका थिए । निवेदनमा पाइक बेहोस अवस्थामा रहेको तर उनको मुटु अझै धड्किरहेको उल्लेख गरिएको थियो ।
साथै, उनले सास फेर्दा घुरेजस्तो आवाज निकालिरहेको पनि बताइएको थियो । पाइकका एक वकिलले बीबीसीलाई बताएअनुसार ५० वर्षीया पाइकलाई पेन्टोबार्बिटल औषधिका दुई सिरिन्ज दिइएको थियो । त्यसपछि उनलाई अस्पताल लगेर उपचार भइरहेको छ ।
क्रिस्टा पाइकलाई सन् १९९६ मा १९ वर्षीया कोलिन स्लेमरको हत्या गरेको अभियोगमा मृत्युदण्ड सुनाइएको थियो । हत्या हुँदा पाइक १८ वर्षकी थिइन् । अभियोजन पक्षका अनुसार पाइक र उनका तत्कालीन प्रेमी टेडारिल शिपले स्लेमरलाई कुटपिट तथा यातना दिएर हत्या गरेका थिए ।
तीनै जनाको भेट समस्यामा परेका किशोरकिशोरीका लागि सञ्चालन गरिएको एक रोजगार तालिम शिविरमा भएको थियो । स्लेमरकी आमा मार्टिनेजले छोरीको हत्यामा संलग्न पाइकलाई सुनाइएको मृत्युदण्ड कार्यान्वयन हुनुपर्ने बताएकी छन् ।
उनले प्रेससँग कुरा गर्दै छोरीले भोगेको पीडा सम्झिँदा आफूलाई त्यो घटना बारम्बार सम्झना आउने बताइन् । उनका अनुसार स्लेमरले त्यसबेला उठेर भाग्ने प्रयास गरिरहेकी थिइन् ।