चितवन, साउन २८-
चितवन जिल्लामा डेंगु र स्क्रब टाईफसका बिरामीहरू बढ्न थालेका छन्। जनस्वास्थ्य कार्यालय, चितवनले साउन १ गतेदेखि साउन २८ गते सम्मको दैनिक अद्यावधिक तथ्याङ्क सार्वजनिक गर्दै जिल्लाभित्र र बाहिरका गरी हालसम्म ३४ जनामा स्क्रब टाईफस र ४ जनामा डेंगु सङ्क्रमण पुष्टि भएको जनाएको छ।
कार्यालयका अनुसार सङ्क्रमण परीक्षण गरिएका कुल २११ जनामध्ये ३४ जनामा स्क्रब टाईफस पोजेटिभ देखिएको छ भने १७८ जनाको परीक्षण गर्दा ४ जनामा डेंगु सङ्क्रमण पुष्टि भएको छ। जिल्लाका स्थानीय तहहरूको विवरण हेर्दा भरतपुर महानगरपालिकामा स्क्रब टाईफसको जोखिम बढी देखिएको जनस्वास्थ्य कार्यालयका सूचना अधिकारी राम केसीले जानकारी दिए। भरतपुरमा १ पुरुष र ४ महिला गरी कुल ५ जनामा स्क्रब टाईफस सङ्क्रमण पुष्टि भएको छ। यस्तै, रत्ननगर नगरपालिकामा १ जना पुरुषमा स्क्रब टाईफस भेटिएको छ।
डेंगु सङ्क्रमणतर्फ भने कालिका नगरपालिकामा १ जना महिला र इच्छाकामना गाउँपालिकामा १ जना पुरुष गरी जिल्लाभित्रका २ जनामा सङ्क्रमण पुष्टि भएको छ। खैरहनी, माडी र राप्ती नगरपालिकामा भने हालसम्म डेंगु र स्क्रब टाईफस दुवैको सङ्क्रमण शून्य रहेको छ।
चितवनका स्वास्थ्य संस्थाहरूमा उपचारका लागि अन्य जिल्लाबाट आएका बिरामीहरूमा सङ्क्रमणको दर उच्च देखिएको छ। अन्य जिल्लाका ११ पुरुष र १७ महिला गरी कुल २८ जनामा स्क्रब टाईफस सङ्क्रमण पुष्टि भएको छ भने २ जना पुरुषमा डेंगु भेटिएको छ। पछिल्लो २४ घण्टामा जिल्लामा डेंगुका २ जना (कालिकाका १ र अन्य जिल्लाका १) तथा स्क्रब टाईफसका २ जना (अन्य जिल्लाका) नयाँ बिरामी थपिएका छन्।
केसीका अनुसार अहिलेको मौसम डेंगु र स्क्रब टाइफसको संक्रमण फैलिने सिजन नै हो । वर्षायाम सुरु भएसँगै कीटजन्य रोगहरूको जोखिम बढ्ने भएकाले आफ्नो वरपरको वातावरण सफा राख्न, पानी जम्न नदिन र लामखुट्टे तथा माइटको टोकाइबाट बच्न जनस्वास्थ्य कार्यालय चितवनले आग्रह गरेको छ।