सौराहा क्षेत्रमा लगातार आतंक मच्चाइरहेको जंगली हात्ती (मकुना)को गोली लागि मृत्यु
चितवन राष्ट्रिय निकुञ्जको सौराहा क्षेत्रमा लामो समयदेखि स्थानीय बस्तीमा आतङ्क मच्चाइरहेको जंगली हात्ती (मकुना) को गोली लागि मृत्यु भएको छ। निकुञ्ज प्रशासनका अनुसार, उक्त हात्तीलाई नियन्त्रण गर्न प्रयास गरिरहेका बेला आत्मरक्षाका लागि गोली चलाउनु परेको थियो।
निकुञ्ज कार्यालयका अनुसार, २०८१ सालको आश्विन महिनादेखि नै मकुना हात्ती स्थानीय बस्तीमा प्रवेश गरी जनधनको जोखिम बढाइरहेको थियो। यसलाई नियन्त्रण गर्न हात्ती स्वीप अभियान सञ्चालन गरिएको थियो। माघ २३ गते, कुमरोज मध्यवर्ती सामुदायिक वनको लामिताल क्षेत्रमा स्वीप गस्ती टोलीले उक्त हात्तीलाई फेला पार्दा हात्तीले सिधै घरपालुवा हात्ती (चुरेगज) लाई आक्रमण गर्न खोजेपछि हवाई फायर गरिएको थियो।
तर, हात्ती नहटेपछि थप गोली चलाउँदा केही पर भागे पनि पुनः आक्रमण गर्न आएको हुँदा अन्ततः ३ राउण्ड फायर गरिएको थियो। पछि खोजी गर्दा करिब १ किलोमिटर टाढा हात्ती अचेत अवस्थामा भेटिएको थियो। प्राविधिक टोलीले तत्कालै उपचार प्रयास गरे पनि १५:३० बजे हात्तीको मृत्यु पुष्टि गरियो।
पोस्टमार्टम रिपोर्ट अनुसार, हात्तीको घाँटीमा लागेको गोली नै मृत्युको कारण भएको पुष्टि भएको छ। चितवन राष्ट्रिय निकुञ्जले जनधनको सुरक्षालाई मध्यनजर गर्दै कानुनी प्रक्रिया अनुसार हात्तीलाई नियन्त्रण गर्ने प्रयास गरिएको जनाएको छ।
Advertisement