भरतपुर , ४ जेठ । स्थानीय र संसदीय निर्वाचनको झल्को दिने गरी होली भिजन पब्लिक स्कुल भरतपुर ४ चितवनमा आज शुक्रवार विभिन्न क्लबहरुको निर्वाचन सम्पन्न भएको छ । निर्वाचनको लागि गठन भएको निर्वाचन समितिले दिएको जानकारी अनुसार शुक्रवार युवा रेडक्रस, नाटा क्लव, ईको क्लव, आई. टी क्लव, प्रिफेक्ट क्लव, स्पीकर्स क्लव र आई क्यु क्लवको निर्वाचन सम्पन भएको हो ।
मतदातालाई मतपत्र हस्तान्तरण गरेर निर्वाचन शुभारम्भ गर्दै विद्यालयका प्राचार्य मीनराज बस्ताकोटीले निर्वाचनको महत्व प्रकाश पार्नुभएको थियो । उहाँले निर्वाचनको महत्व बुझेर जिम्मेवारपूर्ण तरिकाले मतदान गर्न सबैलाई आग्रह गर्नुभयो । विद्यार्थीहरुलाई जिम्मेवार बनाएर शैक्षिक शत्र २०८१ सालका विभिन्न शैक्षिक गतिविधिहरुलाई व्यवस्थित रुपले अगाडि बढाउने उद्देश्यले लोकतान्त्रिक प्रक्रियाअनुसार क्लबहरुको निर्वाचन गरिएको प्रमुख निर्वाचन अधिकृत केशव भट्टराईले जानकारी दिनुभयो । निर्वाचनको लागि सात ओटा मतपेटिका राखिएको थियो भने मत पत्रहरु तयार गरी स्वस्तिक चिन्ह लगाएर मतदान गर्ने व्यवस्था गरिएको थियो ।
अघिल्लो दिने नै उम्मेद्वारहरुको अन्तिम नामावली प्रकाशित गरी मतदाताहरुलाई मतदाता शिक्षा प्रदान गरिएको हुनाले मतदान कार्य सहज भएको निर्वाचन अधिकृत गोपाल कंडेलले जानकारी दिनुभयो । मतदान स्थलमा व्यवस्थित रुपले मतदान गर्ने व्यवस्था मिलाईएको थियो भने पर्यवेक्षकहरुले पनि मतदान स्थलमा अनुगमन गरेका थिए । निर्वाचनमा निर्वाचन आचारसंहिता जारी गरी गरिएको थियो । स्वयमसेवकहरुले मतदाताहरुलाई आवश्यक सहयोग गरिरहेका थिए भने मतदाताहरु खुशी भएर मतदान गरेका थिए । ‘मतदानको कुरा सुनिएको थियो , आज प्रत्यक्ष सहभागी भएर मतदान गर्न पाउँदा खुशी छौँ , हामीलाई निर्वाचन सम्बन्धी पाठ बुझ्न सजिलो भयो।’ कक्षा ६ मा अध्ययनरत सम्पदा कंडेल र प्रेजु कंडेलले जानकारी दिए । निर्वाचन कार्यक्रममा कक्षा ६ देखि १० सम्म अध्ययनरत विद्यार्थीहरु सहभागी भएका थिए । स्मरण रहोस् होली भिजन पब्लिक स्कुलले हरेका वर्ष लोकतान्त्रिक प्रक्रियामार्फत विभिन्न क्लबहरुको निर्वाचन गरी विभिन्न सामाजिक कार्यहरु गर्दै आएको छ ।