रक्तदान अभियानलाई नयाँ उचाइमा पुर्याउँदै चितवनमा शनिबार वृहत् रक्तदान कार्यक्रम आयोजना हुने भएको छ। स्वर्गीय खिमानन्द न्यौपानेको तेस्रो स्मृति दिवसको अवसरमा भरतपुरको चौबिसकोठी चोकमा बिहान ७ बजेदेखि कार्यक्रम सञ्चालन गरिने भएको हो।
करिब दुई दशकदेखि रक्तदान अभियानमा सक्रिय वल्र्ड ब्लड डोनर्स अर्गनाइजेशन नेपालका कार्यक्रम संयोजक हरिप्रसाद न्यौपानेका अनुसार स्मृतिलाई समाजसेवासँग जोड्ने उद्देश्यले कार्यक्रम आयोजना गर्न लागिएको हो। पछिल्ला वर्षहरूमा चितवनमा जन्मोत्सव, स्मृति दिवस र विभिन्न सामाजिक अवसरमा रक्तदान कार्यक्रम गर्ने संस्कार विस्तार हुँदै गएको छ।
न्यौपाने परिवार र वल्र्ड ब्लड डोनर्स अर्गनाइजेशन नेपालको आयोजनामा हुने कार्यक्रममा लायन्स क्लब अफ माडी इको, भुपराज पाठक स्मृति प्रतिष्ठान माडी, लायन्स क्लब अफ ब्लु स्काई, ब्राइट एजुकेशन नेटवर्क प्रा.लि., माडी जेसीज, ग्रीनल्याण्ड पब्लिक स्कुल तथा लायन्स क्लब अफ चितवन सूर्यकिरणले सहकार्य गरेका छन्। कार्यक्रमलाई चितवन मेडिकल कलेज ब्लड बैंकले प्राविधिक सहयोग गर्नेछ।
काठमाडौँपछि सबैभन्दा बढी रगत खपत हुने जिल्लामध्ये चितवन अग्रस्थानमा रहेकाले यहाँ रक्तदान कार्यक्रमलाई निरन्तरता दिइँदै आएको छ। यसै अवसरमा देशभर रक्तदान अभियानमा उल्लेखनीय योगदान पुर्याएका अभियन्ताहरूलाई “राष्ट्रिय रक्तदान उत्प्रेरणा पुरस्कार” प्रदान गरी सम्मानसमेत गरिने आयोजकले जनाएको छ।
रक्तदानलाई जीवनदानको अभियानका रूपमा स्थापित गर्न र समाजमा मानवीय सेवाको भावना थप मजबुत बनाउन कार्यक्रमले महत्वपूर्ण भूमिका खेल्ने अपेक्षा गरिएको छ।