काठमाडौँ । मोबाइलमा प्राप्त एक शङ्कास्पद लिंकमा क्लिक गरेपछि काठमाडौँका सुजन खनालले २५ लाख ४४ हजार १०० रुपैयाँ गुमाएका छन् । सो घटनामा संलग्न रहेको आरोपमा नेपाल प्रहरीको साइबर ब्युरोले दुई जनाविरुद्ध अदालतमा अभियोग पत्र दायर गरेको छ । प्रहरी अनुसन्धानका आधारमा जिल्ला सरकारी वकिल कार्यालय काठमाडौँले सप्तरीका २० वर्षीय आकाशकुमार पासवान र सिरहाका २३ वर्षीय चन्देश्वर महतोलाई प्रतिवादी बनाएर मुद्दा दायर गरेको छ ।

उनीहरू हाल फरार रहेका छन् । उनीहरूविरुद्ध मुलुकी अपराध संहिता, २०७४ को ठगी कसुरअन्तर्गत मुद्दा चलाइएको छ । दोषी ठहर भएमा उनीहरूलाई ७ वर्षसम्म कैद र ७० हजार रुपैयाँसम्म जरिवाना हुन सक्छ । साथै, पीडितलाई पूरा क्षतिपूर्ति भराउन समेत माग गरिएको छ ।

अदालतले फरार रहेका दुवै अभियुक्तलाई पक्राउ गर्न पुर्जी जारी गर्ने प्रक्रिया अगाडि बढाएको छ । खाताबाट यसरी गायब भयो रकम गत २९ जेठ २०८२ मा पीडित खनालको मोबाइलमा ‘THE_ALERT’ नामबाट एउटा सन्देश (SMS) आएको थियो । जसमा लेखिएको थियो– “तपाईंको कनेक्ट आईपीएस खाता सुरक्षाका कारण रोक्का गरिएको छ, सुचारु गर्न यो लिंक (https://rb.gy/o4u15m) मा क्लिक गरी विवरण भर्नुहोस् ।”

उक्त सन्देशलाई आधिकारिक ठानेर खनालले लिंकमा क्लिक गरी आफ्ना बैंकिङ विवरणहरू प्रविष्ट गरे । पछि शङ्का लागेर उनले प्रक्रिया रद्द गरे पनि त्यतिन्जेल ह्याकरहरूले उनको ‘कनेक्ट आईपीएस’ मा अनधिकृत पहुँच बनाइसकेका थिए ।

खनाल राति सुतिरहेको बेला ह्याकरहरूले उनको दुईवटा बैंक खाताबाट रकम ट्रान्सफर गरे । राष्ट्रिय वाणिज्य बैंक र नबिल बैंकबाट आकाशकुमार पासवानको नेपाल एसबीआई बैंकको खातामा सुरुमा परीक्षणका लागि १०० र पछि पटक–पटक गरी ११ लाख ७४ हजार १०० रुपैयाँ पठाइयो ।

दोस्रो दिन जेठ ३१ को बिहान पुनः खनालको राष्ट्रिय वाणिज्य बैंकको खाताबाट चन्देश्वर महतोको लक्ष्मी सनराइज बैंकको खातामा १३ लाख ७० हजार रुपैयाँ सारियो । भोलिपल्ट बिहान मोबाइल खोल्दा मात्र खनालले आफ्नो खाताबाट कुल २५ लाख ४४ हजार १०० रुपैयाँ चोरी भएको पत्तो पाएका थिए ।