चितवन, २५ जेठ २०८३ — राष्ट्रिय स्वतन्त्र पार्टी (रास्वपा) चितवनको जिल्ला नेतृत्व चयनका लागि सम्पन्न निर्वाचनबाट ई. मिनीमाधव खनाल जिल्ला सभापतिमा निर्वाचित हुनुभएको छ। आइतबार सम्पन्न जिल्ला अधिवेशनअन्तर्गत भएको मतदानमा खनालले २२२ मत प्राप्त गर्दै नेतृत्वको जिम्मेवारी हात पार्नुभएको हो।
सभापति पदका लागि भएको प्रतिस्पर्धामा निवर्तमान जिल्ला सभापति कृष्णप्रसाद भुसालले १११ मत प्राप्त गर्नुभयो भने अर्का उम्मेदवार प्रकाश आचार्यले २२ मत प्राप्त गर्नुभयो। यसअघि खनाल रास्वपा चितवन क्षेत्र नम्बर ३ का क्षेत्रीय सभापतिको जिम्मेवारीमा रहनुभएको थियो।
त्यसैगरी, जिल्ला उपसभापतिमा निर्मला गिरि १९० मतसहित निर्वाचित हुनुभएको छ। उहाँका निकटतम प्रतिस्पर्धी टिकादत्त इटनीले ८४ मत तथा प्रभाकर जोशीले ७३ मत प्राप्त गर्नुभएको थियो।
सचिव पदमा तेजेन्द्रप्रसाद पौडेल १९४ मतसहित विजयी हुनुभएको छ। उहाँका प्रतिस्पर्धी नेत्र लामिछानेले १४५ मत प्राप्त गर्नुभएको निर्वाचन समितिले जनाएको छ।
यस्तै, सहसचिव पदमा कुशल पाठक १८७ मतसहित निर्वाचित हुनुभएको छ। उक्त पदका अन्य उम्मेदवार चुमबहादुर जी.सी.ले ३७, पार्वती पाण्डेले ६९ तथा बेदप्रसाद आचार्यले ५४ मत प्राप्त गर्नुभएको थियो।
नवनिर्वाचित पदाधिकारीहरूले पार्टी संगठनलाई थप मजबुत बनाउँदै जिल्लाभर पार्टीका गतिविधिलाई प्रभावकारी ढंगले अघि बढाउने प्रतिबद्धता व्यक्त गरेका छन्। जिल्ला अधिवेशनबाट चयन भएको नयाँ नेतृत्वले चितवनमा रास्वपाको संगठन विस्तार र जनसम्पर्क अभियानलाई थप तीव्रता दिने अपेक्षा गरिएको छ।