रत्ननगर । चितवनको पर्यटकीय नगरी सौराहामा यही पौष ११ गतेबाट सुरु हुने चितवन हात्ती तथा पर्यटन महोत्सवको तयारी अन्तिम चरणमा पुगेको छ । क्षेत्रीय होटल सङ्घ चितवनको आयोजनामा सौराहासहित चितवनको पर्यटन प्रर्वद्धनको लागि हरेक वर्ष यहाँ हात्ती महोत्सव हुँदै आएको छ ।
तीन दिन सम्म चल्ने महोत्सव १९औं संस्करण सम्म आइपुगेको छ । रत्ननगर नगरपालिका संरक्षक र युनाइटेड हात्ती सञ्चालन सहकारी संस्था लि को सहआयोजक रहेको सो महोत्सवको आन्तरिक तथा खेलमैदान व्यवस्थापन र स्टल निर्माणको काम अन्तिम चरणमा पुगेको सङ्घका उपाध्यक्ष तथा महोत्सवका संयोजक गुणराज थपलियाले बताए ।
महोत्सवका लागि बाघमारा चौर व्यवस्थापन र स्टल निर्माणको काम तीब्र गतिमा चलिरहेका बेला हात्तीहरू भने पेनाल्टी सुटआउटको अभ्यास गरिरहेका छन् । हात्तीले अभ्यासमा गरिरहेको दृश्य हेर्न सौराहा आएका पर्यटक त्यहाँ पुग्ने गरेका छन् । हात्ती महोत्सव सुरु नहुँदै सौराहामा आन्तरिक तथा बाह्य पर्यटक वृद्धि हुन थालेको सङ्घका अध्यक्ष ओमप्रकाश पाण्डेले बताए । होटलहरूमा धमाधम बुकिङ आउन सुरु भइसकेको छ उनले भने महोत्सवकै अवसरमा सौराहामा पर्यटकका लागि १० प्रतिशत छुटको व्यवस्था गरेका छौँ ।
महोत्सव बागमती प्रदेश सरकारका मुख्यमन्त्री माननीय इन्द्रबहादुर बानियाँले उद्घाटन गर्नेछन् । महोत्सव अन्तर्गत हात्तीको पेनाल्टी सुटआउट, हात्तीको शृङ्गार प्रतियोगिता, हात्ती बनभोज, हात्तीको स्वास्थ्य शिविर, हात्तीको दिनचर्या बारे जानकारी तथा हात्तीको पुजा गर्ने कार्यक्रम तय गरिएको सङ्घका महासचिव महेश खनालले जानकारी दिए । उक्त गतिविधिमा सरकारी र निजी गरी ८० वटा हात्ती सहभागी हुने छन् । महोत्सव अन्तर्गत पालिका स्तरीय डुङ्गा रेस प्रतियोगिता तथा करिब ७० वटा हात्तीहरू द्वारा शोभा यात्रा निकालिने छ । साथै विभिन्न जातजातिको सांस्कृतिक झाँकी प्रदर्शन, हात्तीमैत्री प्रतियोगिता तथा सफारी पर्यटन प्रवर्द्धनको लागि अतिथि पाहुनाहरूलाई हात्ती सफारी/जीप सफारी/डुङ्गा सफारी गराउने कार्यक्रम तय गरिएको छ ।
सौराहामा दुई दशक अघि देखि आयोजना हुँदै आएको यस महोत्सवले हरेक वर्ष २५ देखि ३० प्रतिशत पर्यटकहरूको आगमनमा वृद्धि हुने गरेको सङ्घका अध्यक्ष पाण्डेले बताए । सौराहामा १५० होटल र ९० बढी रेष्टुरेन्टहरू रहेका छन् । सफारी पर्यटनका हिसाबले सौराहा विदेशी पर्यटकको गन्तव्य स्थल हो । तर पछिल्लो समय सौराहामा विदेशी पर्यटकको आगमनमा कमी आएको छ । देशको बिग्रदो परिस्थितिका कारण सौराहाका कतिपय होटल खाली हुने गरेका छन महासचिव खनालले भने पर्यटकीय गतिविधि गर्दा पर्यटक आगमनमा वृद्धि हुने गरेको छ । चितवनमा वार्षिक तीन लाख हजार पर्यटक आउने गरेका छन् । चितवन आउने मध्ये ९० प्रतिशत पर्यटक सौराहा पुगेर सफारीमा रमाउने गरेका छन् ।