गौरवको आयोजना खोरेत मुक्त सेतो माडी अभियान अन्तर्गत दुई दिने जलवायु मैत्री असल पशुपालन अभ्यास तथा व्यवस्थापन तालिम सम्पन्न भएको छ।
उक्त कार्यक्रम माडी नगरपालिका ९ गणेशकुञ्ज स्थित राम मन्दिर सामुदायिक भवनमा सम्पन्न भएको हो। माडी एकीकृत समाबेशी दिगो बिकास परियोजनाका अध्यक्ष कृष्णराज अधिकारीको अध्यक्षतामा सम्पन्न कार्यक्रममा माडी ९ का वडाध्यक्ष घनश्याम दवाडीको प्रमुख आतिथ्यता थियो ।
तालिममा पशु चिकित्सक डा. संतोष क्षेत्री र श्याम खड्काले पशुको आहार, हेरचाह, उन्नत नश्ल प्रवर्द्धन र दुग्ध उत्पादन वृद्धि सम्बन्धी प्रशिक्षण दिनुभएको हो ।राष्ट्रिय व्यवसायिक पशुपालन तथा दुग्ध उत्पादक कृषक समाज माडीको आयोजनामा भएको कार्यक्रममा माडी एकीकृत समावेशी दिगो विकास परियोजनाको प्राविधिक सहयोगमा भैरवी दुग्ध उत्पादक सहकारी संस्था लिमिटेड, चितवन जिल्ला दुग्ध उत्पादक सहकारी संघ र माडी नगरपालिकाको सह–प्रवर्द्धनमा कार्यक्रम भएको हो ।
तालिममा ४० जना भन्दाबढी वडाबासीको उल्लेख्य सहभागिता रहेको भैरवी दुग्ध सहकारीका कार्यक्रम कोर्डिनेटर हरि सुवेदीले जानकारी दिनुभयो ।