- सामुदायिक विद्यालयमा कम्प्युटर शिक्षक राख्न, विश्वविद्यालयलाई ९० दिनभित्र नतिजा प्रकाशन गर्न र त्रिभुवन विश्वविद्यालयको झाडी फाँडेर फुटपाथसहित बगैंचा बनाउन निर्देशन /
- काठमाडौँ — शिक्षा, विज्ञान तथा प्रविधि मन्त्रालयका कर्मचारीलाई मंगलबार ओढ्ने–ओछ्याउने कपडादेखि भाँडाकुँडा जोहो गर्न भ्याइनभ्याइ थियो । नवनियुक्त मन्त्री महावीर पुनले २४ सै घण्टा मन्त्रालयमै बस्ने बताएपछि उनका लागि ओछ्यान र खानपानका लागि सामग्री जुटाउन केही कर्मचारी व्यस्त देखिन्थे ।
- बस्ने–खाने जोरजाम भएपछि मंगलबारदेखि मन्त्री पुन केशरमहलस्थित शिक्षा मन्त्रालयमै बस्न थालेका छन् । प्रवक्ता शिवकुमार सापकोटाले मन्त्रीको कार्यकक्ष सँगैको कोठामा खाने–बस्ने प्रबन्ध गरिएको बताए । ‘कार्यकक्ष सँगैका कोठा खाली गरेर सुत्ने, बस्ने र भान्सा बनाइएको छ ।
- मन्त्रीज्यू त्यहीं बस्न थाल्नुभएको छ,’ उनले भने । २४ भदौको प्रदर्शनमा सिंहदरबारभित्रको शिक्षा मन्त्रालयमा आगजनी भएपछि मन्त्रालयलाई अस्थायी रूपमा ठमेलस्थित केशरमहलमा सारिएको छ । केशर पुस्तकालय सँगैको उक्त भवनको पहिलो तलामा शिक्षामन्त्रीको कार्यकक्ष स्थापना गरिएको छ ।
- कार्यकक्षमा जोडिएकै कोठामा मन्त्रीको आवास व्यवस्था गरिएको हो । मन्त्री पुनले सोमबार शपथपछि कार्यकक्षमा पदभार ग्रहण गर्दै सचिव चुडामणि पौडेललाई आफ्ना लागि गाँस, बासको व्यवस्था पनि मन्त्रालयभित्रै मिलाइदिन आग्रह गरेका थिए ।
- २४ सै घण्टा मन्त्रालयमा बसेर काम गर्ने उनले घोषणा गरेका थिए । ‘म जता गए पनि जहाँ काम गर्छु त्यहीं बास बस्ने बानी छ । राष्ट्रिय आविष्कार केन्द्रमा काम गर्दा पनि त्यहीं बस्थें । काम परे कीर्तिपुरबाट २ महिनामा मात्रै काठमाडौं निस्कन्थें । म वीरगन्ज गए पनि जहाँ काम गर्यो त्यहीं बस्ने हो,’ उनले भने, ‘मलाई एउटा सुत्ने खाट चाहियो । टेबल–कुर्सी चाहियो । किचन चाहियो । म आफैं पकाएर खान्छु ।’ मन्त्री नियुक्तिसँगै आविष्कार केन्द्रबाट अलग भएको उनले जनाए ।
- सोमबार राति भने उनी बास बस्न कीर्तिपुर नै पुगेका थिए । मन्त्री पुनले मन्त्रालयभित्रै सुरक्षाकर्मीलाई पनि सँगै बस्ने प्रस्ताव गरेका छन् । मन्त्रालयको काममा मात्रै सरकारी गाडीको सुविधा लिने उनको भनाइ छ । ‘माथि रिपोर्ट गर्नु मन्त्रालयबाट बाहिर निस्केको बेला मेरो पछिपछि आउन पर्दैन,’ साथमा खटिएका सुरक्षाकर्मीलाई उनले भनेका थिए । मन्त्रालयका प्रवक्ता सापकोटाले सुरक्षाकर्मीलाई समेत मन्त्रालयभित्रै बस्ने ठाउँको प्रबन्ध मिलाइएको बताए । ‘कोठाहरू खाली गर्दै मन्त्रीज्यूको टिमलाई बस्ने ठाउँ बनाएका छौं,’ उनले भने, ‘१/२ दिनमा व्यवस्थित हुन्छ ।’ उनले खाना आफैं पकाउने भने पनि सहयोगका लागि एक जना कार्यालय सहयोगी खटाइएको मन्त्रालयले जनाएको छ ।
- मंगलबार दिनभर मन्त्री पुन मन्त्रालयकै काममा व्यस्त थिए । कर्मचारीहरूसँग ब्रिफिङ र आगन्तुकहरूसँग भेटघाट गरेर बसेका थिए । त्यस क्रममा उठेका विषयलाई समेटेर उनले तीनबुँदे निर्देशनसमेत जारी गरेका छन् । सामाजिक सञ्जालमा सार्वजनिक गरिएको निर्देशनमा मन्त्री पुनले प्रत्येक सामुदायिक विद्यालयमा कम्प्युटर शिक्षकको व्यवस्था गरिने प्रस्ताव गरेका छन् ।
- सामुदायिक विद्यालयमा पढ्ने विद्यार्थीहरू कम्प्युटर शिक्षाबाट वञ्चित नहुन् भन्ने उद्देश्यले पठनपाठनका लागि हरेक विद्यालयमा एक जना कम्प्युटर शिक्षकको दरबन्दी अनिवार्य थप्नुपर्ने उनले बताए ।
- अर्थ मन्त्रालयबाट स्वीकृत लिएर मात्र शिक्षा तथा मानवस्रोत विकास केन्द्रले शिक्षक दरबन्दी थप गर्न सक्छ । २० वर्षदेखि सामुदायिक विद्यालयमा दरबन्दी थप भएको छैन । विद्यालय शिक्षा विधेयकले राहत, अस्थायीलगायत ४० हजार शिक्षकलाई स्वतः दरबन्दीमा रूपान्तरण गर्ने प्रस्ताव गरेको थियो । तर सरकार परिवर्तन र संसद् विघटनका कारण विधेयक निष्क्रिय बनेको छ । परीक्षाको नतिजा ३ महिनाभित्र सार्वजनिक गर्न पनि मन्त्री पुनले शिक्षण संस्थालाई निर्देशन दिएका छन् ।
- ‘केही विश्वविद्यालयहरूले परीक्षा लिएर परीक्षाफल निकाल्न ८ महिनादेखि १ वर्षसम्म लगाउँदा रहेछन् । विद्यार्थीहरूका लागि त्यो अपूरणीय क्षति हो । त्यसैले विश्वविद्यालयलाई बढीमा ३ महिनाभित्र अनिवार्य रूपमा परीक्षाफल निकाल्न निर्देशन दिएको छु,’ सामाजिक सञ्जालमा मन्त्री पुनले लेखेका छन्, ‘समयमै परीक्षाफल ननिकाल्ने विश्वविद्यालयहरूको अनुदान रोक्का गरिनेछ । राष्ट्रिय परीक्षा बोर्डले कक्षा १२ का ५ लाख विद्यार्थीको परीक्षाफल ३ महिनाभित्रै सार्वजनिक गर्दै आएको बताएका छन् । त्यस्तै, त्रिभुवन विश्वविद्यालयका सहकुलपतिसमेत रहेका मन्त्री पुनले कीर्तिपुरको हाताभित्रको झाडी फाँडेर बगैंचासहित फुटपाथ बनाएर विश्वविद्यालयलाई आकर्षक बनाउनसमेत निर्देशन दिएका छन् । ठूला रुख भने काट्न नमिल्ने उनको निर्देशनमा उल्लेख छ ।
Advertisement