भक्तपुर । नेपाल प्रहरीले मिडियाको कार्यालयमै पुगेर पत्रकारहरूमाथि प्रहरीले धरपकड सुर गरेको छ ।
पूर्वप्रधान न्यायाधीश चोलेन्द्र शमशेर जबरासग ‘कनेक्सन’ देखिएका इनम सापकोटाको मोबाइलमा भेटिएको सम्पर्क विवरण सार्वजनिक गर्ने पत्रकारहरूमाथि प्रहरीले धरपकड गरेको हो।
प्रहरीले नेपाल प्रेसका पत्रकार विश्वमणि सुवेदी र मोटिभेट न्यूज डटकमका अध्यक्ष एवं प्रधान सम्पादक शोभराज बराललाई नियन्त्रणमा लिएको छ।
सुवेदीलाई मीनभवनस्थित नेपाल प्रेसको समाचार कक्षबाटै प्रहरीले नियन्त्रणमा लिएको हो। मोटिभेट न्युजका अध्यक्ष तथा प्रधान सम्पादक बराल अनामनगरबाट पक्राउ परेका हुन् ।
पुतलीसडकस्थित नयाँ पत्रिकाको कार्यालयमा समेत प्रहरी परिचालन गरिएको छ। नयाँ पत्रिकाले इनम सापकोटा र सर्वोच्चका न्यायाधीश हरि फुयाँलको बिचमा कुराकानी हुने गरेको विवरण सार्वजनिक गरेको थियो । त्यहाँ पुगेका सादा पोसाकका प्रहरीले पत्रकार नवराज मैनालीलाई खोजीरहेको छ।
स्रोतमाथिको विश्वासघात नगर्ने पौडेलको भनाई
प्रहरीको साइबर ब्यूरोले नेपाल प्रेसका प्रधानसम्पादक मातृका पौडेल र अध्यक्ष विन्दु लम्साललाई पनि फोन गरेर बोलाएपछि उनीहरु व्यूरो कार्यालयमा पुगेका छन् ।
साइबर व्युरो पुगेका नेपाल प्रेसका प्रधानसम्पादक पौडेलले ‘समाचारका स्रोत पत्रकारको मृत्युसँगै समाप्त हुने भन्दै बुट र धम्की अनि हतकडीको डरले स्रोतमाथिको विश्वासघात गर्न नसकिने’ बताएका छन् ।
प्रधानसम्पादक पौडेलले सामाजिक सञ्जालमा स्टाटस लेख्दै आफ्नो पेशा र कर्मप्रति अविचलित रहने बताएका छन् ।