पत्रकार महासङ्घ चितवन शाखाले एक समारोहका बीच चितवनका झण्डै ३ दर्जन अग्रज पत्रकारहरुलाई सम्मान गरेको छ। भने नौजना युवा पत्रकारहरुलाई पुरस्कृत पनि गरेको छ । विसं २०५६ अगाडि नेपाल पत्रकार महासङ्घको सदस्यता लिएर क्रियाशील एवम् पूर्वअध्यक्ष गरी ३४ जना पत्रकारलाई सम्मान एवम् विभिन्न विधामा पत्रकारलाई पुरस्कृत गरिएको हो ।
महासंघले भरतपुर स्थित क्यान्सर अस्पतालको सभाहलमा आज शनिबार अग्रज पत्रकार सम्मान तथा पुरस्कार वितरण समारोहको आयोजना गरी पत्रकारितामा २५ वर्ष पूरा गरेका पत्रकारलाई सम्मान गरेको हो। कार्यक्रमका प्रमुख अतिथि एवं भरतपुर महानगरपालिकाका प्रमुख रेणु दाहाल, नेपाल पत्रकार महासंघका केन्द्रीय अध्यक्ष बिपुल पोखरेल लगायतले संयुक्त रुपमा पत्रकारहरुलाई सम्मान तथा पुरस्कार वितरण गरेका थिए।
कार्यक्रममा जेष्ठ पत्रकार गणेशशेखर शर्मा, रेशम बिरही, गोविन्दराजविनोदी, बाबुराम घिमिरे, गोपाल परियार, विष्णु छिमेकी, महेन्द्रराज श्रेष्ठ देखि युवा पत्रकार सुमन गैरेसम्म सम्मानित भएका छन् । विगत २७ वर्षदेखि पत्रकारितामा अनवरत रुपमा लागेका गैरेले स्थानीय तथा राष्ट्रिय पत्रपत्रिकाहरूमा लामो समयसम्म कलम चलाउँदै आएका थिए। उनी अहिले चित्रवन सन्देश तथा चित्रवन न्यूजडटकमका सम्पादक हुन्।
महासङ्घले स्थापना गरेको ५१ हजार १११ रुपैयाँ राशिको मैयादेवी पत्रकारिता पुरस्कार–२०८० बाट सृजना अर्याल, ५० हजार ५१ रुपैयाँ राशिको अनन्त गङ्गा पत्रकारिता पुरस्कार–२०८० बाट चाँदनी हमाल पुरस्कृत भएका छन् । त्यस्तै, ११ हजार ३११ रुपैयाँ राशिको तिलचन साँखी पत्रकारिता पुरस्कारबाट तीन जना पत्रकारलाई पुरस्कृत गरिएको छ । यो पुरस्कार शालिग्राम नेपाल, विमल खतिवडा र टीकादत्त तिमिल्सिनालाई प्रदान गरियो ।
त्यसैगरी, औद्योगिक पत्रकारिता पुरस्कारबाट दुई जना पत्रकार पुरस्कृत भएका छन् । ११ हजार १११ रुपैयाँ राशिको यस पुरस्कारबाट सन्तकुमार चौधरी र हीरालाल गुरुङ पुरस्कृत भएका अधिकारीले जानकारी दिए । त्यस्तै ११ हजार १११ रुपैयाँ राशीको बालकुमारी विष्णुकुमारी अभ्युदय पत्रकारिता पुरस्कारबाट केशु लामिछाने र १० हजार १११ रुपैयाँ राशिको श्रुजश्री मैयादेवी पत्रकारिता पुरस्कारबाट प्रतिमा कुमाल सम्मानित भएको चितवन शाखाका सचिव दिपेन्द्र अधिकारीले बताए ।