चितवन, माडी । माडी नगरपालिका–६ को रामराज्यपुर माथिल्लो क्षेत्रमा रहेका तीन टोल विकास संस्थालाई एकीकृत गर्दै नयाँ टोल विकास संस्था गठन गरिएको छ। जनसेवा, बागेश्वरी र विकास टोल विकास संस्थालाई समेटेर ‘मजुवा टोल विकास संस्था’ स्थापना गरिएको हो।

हालै सम्पन्न टोल भेलाले शेरबहादुर सुवेदीको नेतृत्वमा ९ सदस्यीय कार्यसमिति सर्वसम्मत चयन गरेको छ। समितिको उपाध्यक्षमा लक्ष्मी सेन्चुरी, सचिवमा तमबहादुर विश्वकर्मा, सहसचिवमा थमनबहादुर घर्ती तथा कोषाध्यक्षमा सन्तु बिक चयन हुनुभएको छ।

त्यसैगरी, सदस्यहरूमा प्रतिभा सुनार, पार्वती सुनार, भूपेन्द्र आचार्य र सुकबहादुर सुनार रहनुभएको छ।

वडा सदस्य धनबहादुर विश्वकर्माको अध्यक्षतामा सम्पन्न भेलाको सञ्चालन समाजसेवी सूर्य भट्टराईले गर्नुभएको थियो।

स्थानीय स्तरमा विकास निर्माणका कामलाई प्रभावकारी बनाउने, सामाजिक एकतालाई सुदृढ गर्ने तथा सामुदायिक गतिविधिलाई व्यवस्थित रूपमा अघि बढाउने लक्ष्यसहित तीन संस्थालाई एकीकृत गरी नयाँ संस्था गठन गरिएको सहभागीहरूले बताएका छन्।