तेहरान : इजरायल र अमेरिकाले गरेको आक्रमणमा इरानका रक्षामन्त्री र गार्ड कमाण्डर मारिएका छन्। अन्य धेरै शीर्ष सरकारी र सैन्य अधिकारीहरू पनि मारिएको जानकारी दिइएको छ। यी आक्रमणमा तेहरानमा रहेको इरानका सर्वोच्च नेता अयातोल्ला अली खामेनीको कार्यालयलाई लक्षित गरिएको थियो। स्याटेलाइटबाट लिइएका तस्बिरहरूले खामेनीको कार्यालय भग्नावशेषमा परिणत भएको देखाएका छन्। यसैबीच इजरायलले आत्म सुरक्षाका लागि इरानमाथि आक्रमण गरेको दाबी गरेको छ। पछि इरानले पनि बदला लिएको छ। इजरायली सैन्य कारबाहीसँग परिचित दुई स्रोत र एक क्षेत्रीय स्रोतले इजरायली आक्रमणमा इरानका रक्षामन्त्री अमिर नासिरजादे र रिभोल्युसनरी गार्ड्सका कमाण्डर मोहम्मद पाकपुरको मृत्यु भएको विश्वास गरिएको रोयटर्सले जनाएको छ। इरानको रेड क्रिसेन्ट सोसाइटीले आजदेखि शुरु भएको अमेरिका र इजरायली आक्रमणबाट इरानका ३१ प्रान्तमध्ये २० भन्दा बढी प्रभावित भएको बताएको छ। राज्य सञ्चालित मिडियाका अनुसार ‘अहिलेसम्म २० भन्दा बढी प्रान्त आक्रमणबाट प्रभावित भएका छन्’‚ प्रवक्ता मोज्तबा खालेदीले भने। साउदी अरेबियाको विदेश मन्त्रालयले इरानले रियाद र देशको पूर्वी क्षेत्रलाई निशाना बनाएको पुष्टि गरेको छ। यसले साउदी अरेबियाले इरानी आक्रमणलाई विफल पारेको दाबी गरेको छ। उसले भनेको छ, “यी आक्रमणलाई कुनै पनि तरिकाले जायज ठहराउन सकिँदैन। इरानी अधिकारीहरूलाई थाहा भए पनि यी आक्रमण भएका थिए। साउदीले आफ्नो हवाई क्षेत्र र भूमि क्षेत्रलाई इरानविरुद्ध प्रयोग गर्न दिने छैन वचन दिएको थियो।” कतारका अमिर शेख तमिम बिन हमद अल थानीले संयुक्त अरब इमिरेट्सका राष्ट्रपतिसँग क्षेत्रको अवस्थाबारे छलफल गरेका छन्।