काठमाण्डाै – फ्लोरिकल्चर एशोसिएसन नेपालले यस वर्षको तिहार पर्वमा देशभर ४६ लाख २० हजार माला खपत हुने अनुमान गरेको छ ।
सयपत्री फूलको ४० लाख, मखमखी फूलको पाँच लाख ५० हजार, गोदावरी फूलको २० हजार र मिक्स माला ५० हजार गरी देशभर ४६ लाख २० हजार माला माग हुने अनुमान गरेको एशोसिएसनका अध्यक्ष राजेशभक्त श्रेष्ठले जानकारी दिनुभयो ।
उहाँका अनुसार यस वर्ष सयपत्री मालाको सरदर थोक मूल्य प्रतिथान ८५ रुपैयाँ, मखमली फूल मालाको ४५ रुपैयाँ, मिक्स फूल मालाको तीन सय ५० र गोदावरी फूलको माला प्रतिगोटा एक हजार दुई सय रुपैयाँ पर्ने छ ।
ग्रामीण क्षेत्रमा सयपत्री फूलको माग शतप्रतिशत आन्तरिक उत्पादनले धान्छ । शहर केन्द्रित क्षेत्रहरूमा भने झन्डै साढे १२ प्रतिशत आयात गर्नुपर्ने देखिएको अध्यक्ष श्रेष्ठले बताउनुभयो ।
गएको १८ र १९ गते परेको अविरल वर्षाका कारण सयपत्री लगायतका फूलखेतीमा क्षति पुगेकोले केही मात्रामा आयात गर्नुपर्ने देखिएको हो । गएको वर्ष सयपत्रीका सात लाख माला आयात गरेकोमा यस वर्ष पाँच लाख आयात हुने अध्यक्ष श्रेष्ठले बताउनुभयो ।
मखमली फूलको भने झन्डै दुई लाख माला निर्यात हुनेछ । यस वर्षको तिहारमा ४० करोड ६२ लाख रुपैयाँ बराबरको फूलको कारोबार हुने अनुमान छ ।