जेनजी आन्दोलनका क्रममा व्यक्तिगत मोटरसाइकलमा आगजनी गर्ने एक जनाले डेढ लाख रुपैयाँ तिरेका छन्। तुलसीपुर बस्ने २६ वर्षीय सञ्जय शर्माले बिहीबार पीडितलाई डेढ लाख रुपैयाँ नगद बुझाएका हुन्। रूकुम पश्चिमको चौरजहारी नगरपालिका–१३ का उनी भदौ २४ गते भएको प्रदर्शनमा सहभागी भएका थिए। त्यसक्रममा उनले तुलसीपुरका केशवराज भुसालको मोटरसाइकलमा आगजनी गरेको आरोप छ। भुसाल नेपाली कांग्रेस निकट नेपाल तरूण दलका तुलसीपुर नगर उपसभापति हुन्। उनको बा ८१ प ९३९६ नम्बरको बाइकमा आगजनी भएको थियो। भुसालले आफ्नो मोटरसाइकल तुलसीपुर उपमहानगरपालिकाको प्रशासनिक भवनको अन्डरग्राउन्डमा राखेका थिए। आफ्नो मोटरसाइकल नष्ट भएपछि भुसालले सिसिटिभी फुटेज र नगर प्रहरीसँगको सहकार्यबाट उनले आगजनीमा पाँच जना संलग्न रहेको पत्ता लगाए। Laxmi bank खोजी क्रममा सञ्जय शर्मालाई फेला पारेपछि भुसालले क्षतिपूर्ति माग गरेका थिए। सञ्जयविरूद्ध किटानी जाहेरी दिने तयारी गरेपछि आफ्नो भागमा पर्ने क्षतिपूर्ति दिन सहमत भएका हुन्। Ncell गल्ती स्वीकार गर्दै सञ्जयले भुसाललाई डेढ लाख क्षतिपूर्ति दिने सहमतिपछि दुवै पक्षबीच लेखापढी भएको थियो। पेसाले तुलसीपुरमा विद्युत वाइरिङ गर्ने सञ्जयले बिहीबार नगद डेढ लाख बुझाए। त्यसपछि कानुन व्यवसायी उपस्थितिमा भुसालले सही–छापसहित मेलमिलापको कागज बनाए। सहमति पत्रअनुसार अबदेखि भुसालले सञ्जयविरूद्ध कुनै किटानी जाहेरी वा उजुरी नदिने सहमति भएको छ। यो सहमति इलाका प्रहरी कार्यालय तुलसीपुर परिसरमै बिहीबार भएको थियो। यसैबारे शुक्रबार भुसालले आफ्नो मोटरसाइकलमा आगजनी गर्नेमध्ये अर्का युवा विशाल गुप्तालाई पनि पहिचान गरेका छन्। उनका विरूद्ध पनि इप्रका तुलसीपुरमा किटानी जाहेरी दिने अन्तिम तयारी भइरहेको छ। घटनाका प्रत्यक्षदर्शी नगर प्रहरी दिनेश चौधरी र डिल्ली न्यौपानेले सनाखत गरिदिएपछि शुक्रबार बिहान गुप्ता पक्राउ परेका हुन्। गुप्तासहित तीन जनाविरूद्ध किटानी जाहेरी दिने तयारी भइरहेको छ। तुलसीपुर उपमहानगरपालिकाका जिन्सी शाखा प्रमुख शिव शर्माका अनुसार अन्डरग्राउन्ड पार्किङमा राखिएका १३ वटा मोटरसाइकल र ६ वटा गाडी आगजनीमा नष्ट भएका छन्। पाँच वटा गाडी सरकारी, एउटा गाडी उपमहानगरपालिकाको लिफ्ट मर्मतका लागि आएको निजी गाडी हो। जलेका सवारी साधनमध्ये ६ वटा व्यक्तिका निजी गाडी हुन्—चार वटा कर्मचारीका मोटरसाइकल र दुई वटा सर्वसाधारणका मोटरसाइकल छन्। भदौ २४ गते जेनजी आन्दोलनका क्रममा उपमेयर श्यानी चौधरी चढ्ने गाडी, उपमहानगरको दमकल, पानी ट्यांकरमा पनि आगजनी भएको प्रमुख शर्माले बताए। टिपर, डोजरलगायत फोहर बोक्ने गाडी बाहिर रहेका कारण जोगिएका थिए। आगजनीबाट उपमहानगरपालिकाको दुई प्रशासनिक भवन ध्वस्त भएका छन्। नयाँ निर्माण गरिएको सात तले ‘तुलसी टावर’का सम्पूर्ण सिसा फुटेका छन्। प्रारम्भिक अनुसन्धानअनुसार यो भवन व्यावसायिक प्रयोजनका लागि टेन्डर दिन तयारी हुँदै थियो। दुई प्रशासनिक भवनमध्ये मेयर, उपमेयरसहित अधिकांश कर्मचारीको कार्यकक्ष रहेको झन्डै पाँच करोड ५० लाख लागतमा बनेको भवन समेत काम नलाग्ने भएको छ। प्राविधिक अनुसन्धानअनुसार भवन बस्न अयोग्य बनेको छ। लुम्बिनी प्रदेशका १२ जिल्लाका १०९ पालिकामध्ये सबैभन्दा बढी क्षति तुलसीपुर उपमहानगरपालिकामा भएको देखिन्छ।