जनकल्याण मा वि माडी–६ मा वार्षिक पुरस्कार वितरण तथा अभिभावक भेला सम्पन्न

जनकल्याण माध्यमिक विद्यालय माडी–६ मा २०८१ सालको वार्षिक पुरस्कार वितरण तथा अभिभावक भेला भव्य रूपमा सम्पन्न भएको छ।

कार्यक्रममा २.८ जि पि ए भन्दा माथि ल्याउने करिब ३०० जना विद्यार्थीहरूलाई पुरस्कार वितरण गरी सम्मान गरिएको थियो। त्यस्तै, कक्षा ८ को नगर स्तरीय परीक्षामा माडी क्षेत्रमै प्रथम भएकी जनकल्याण मावि माडी–६ की छात्रा प्रमिसा पौडेललाई नगद रू ५,०००, एक सम्मान पत्र तथा शैक्षिक सामग्री सहित विशेष सम्मान गरिएको शिक्षक अमृत गायकले जानकारी दिनुभयो ।

कार्यक्रमका सभाध्यक्ष अभिभावक संघका जेष्ठ सदस्य यम प्रसाद पौडेल रहनु भएको थियो भने प्रमुख अतिथिका रूपमा नगर प्रमुख तारा कुमारी काजी महतोको उपस्थिति रहेको थियो। विशिष्ट अतिथि वडा नं ७ की वडा अध्यक्ष चन्द्रा वानियाँ रहनुभएको कार्यक्रममा वि.व्या.स. अध्यक्ष श्यामकुमार विष्ट, अभिभावक संघ अध्यक्ष शेर बहादुर सुवेदी तथा वडा नं ६ का वडा सदस्य धन बहादुर विक अतिथिको रूपमा सहभागी हुनु भएको थियो।