आईसीसी टी–२० विश्वकप क्रिकेटमा आज राति समूह ‘डी‘ का श्रीलङ्का र दक्षिण अफ्रिका खेल्दैछन् । यो खेल राति सवा ८ बजे न्युयोर्कमा शुरु हुनेछ ।

यसैबीच आज बिहान भएको खेलमा नामिबियाले ओमानलाई सुपर ओभरमा हराएको छ । ओमानले दिएको १ सय १० रनको लक्ष्य पछ्याएको नामिबियाले २० ओभरमा ६ विकेट गुमाएर १ सय ९ रनमात्र बनाउन सकेपछि खेल सुपर ओभरमा पुगेको थियो । सुपर ओभरमा २२ रनको लक्ष्य पाएको ओमानले १ विकेट गुमाएर १० रनमात्र बनाउन सकेपछि नामिबिया विजयी भएको हो ।

अमेरिका र वेस्ट इन्डिजले संयुक्त रूपमा आयोजना गरेको नवौँ संस्करणको प्रतियोगिता हिजोदेखि शुरु भएको हो । केही खेल अमेरिकामा र धेरैजसो खेल वेस्ट इन्डिजमा हुनेछन् ।

२० वटा टोली सहभागी प्रतियोगिता जुन २९ तारिखसम्म चल्नेछ । नेपालले भोलि नेदरल्यान्ड्ससँग खेल्दै प्रतियोगिताको शुरुवात गर्दैछ । याे खेल राति सवा ९ बजे अमेरिकाकाे डल्लासमा शुरु हुनेछ ।