काठमाडौँ — सरकारले विभिन्न सामाजिक सञ्जालमा लगाएको प्रतिबन्धविरुद्ध नेपाल पत्रकार महासंघका पूर्वअध्यक्ष, पदाधिकारी तथा विभिन्न मिडियामा कार्यरत सञ्चारकर्मीहरूले माइतीघरमा आज प्रदर्शन गरेका छन् ।सरकारको यस्तो कदमले लोकतान्त्रिक समाजमा अभिव्यक्ति स्वतन्त्रतालाई निस्तेज गर्न खोजिएको पत्रकारहरुले बताएका छन् । उनीहरुले ‘सञ्जाल बन्द, आवाज बन्द’, ‘जनताको मुख थुन्न पाइँदैन’, ‘अलोकतान्त्रिक निर्णय फिर्ता गर’, ‘अभिव्यक्ति स्वतन्त्रता हाम्रो अधिकार’, ‘लोकतन्त्र ह्याक हुँदैछ, निरंकुशता ब्याक हुँदैछ’ लगायतका प्लाकार्ड बोकेका थिए ।सरकारले सञ्चार मन्त्रालयमा सूचीकृत नभएका सामाजिक सञ्जालमा प्रतिबन्ध लगाउने निर्णय बिहीबार गरेको थियो । यो निर्णयप्रति आम सर्वसाधारण, सञ्चार सम्बद्ध संघसंस्था लगायतले विरोध जनाएका छन् ।