माडी नगरपालिका वडा नं ८ मा निर्माण सम्पन्न भएको वैकुण्ठे भूमिगत खानेपानी परियोजनाको आज शनिबार उद्घाटन गरी माडी नगरपालिकालाई हस्तान्तरण गरिएको छ ।

करिव १० करोडको लागतमा निर्माण सम्पन्न भएको खानेपानी परियोजना वागमती प्रदेश सभा सदस्य ठाकुरप्रसाद ढकाल र माडी नगरपालिकाकी मेयर ताराकाजी महतोले संयुक्त रुपमा उद्घाटन गर्नुभएको हो । कार्यक्रमका प्रमुख अतिथि वागमती प्रदेशसभा सदस्य ढकालले खानेपानीको आवश्यकता रहेको यस क्षेत्रमा खानेपानीको विशाल परियोजना सम्पन्न हुनु गौरवको विषय रहेको उल्लेख गर्दै यसको संरक्षण र सम्बर्द्धनको जिम्मेवारी स्थानीयले लिनुपर्ने बताउनुभयो ।

कार्यक्रमकी विशिष्ट अतिथि माडी नगरप्रमुख ताराकाजी महतोले खानेपानी परियोजना माडी नगरपालिकालाई हस्तान्तरण गरेकोमा आयोजक संस्थाप्रति धन्यवाद ज्ञापन गर्दै माडी नगरपालिकाले यसको संरक्षण र विकास माडी नगरपालिकाले गर्ने जानकारी दिनुभयो । कार्यक्रममा बोल्दै डेनिस समाजसेवी लोने पिटर्सनले परियोजनाको संरक्षण र विकास गर्न सम्पूर्ण उपभोक्तालाई आग्रह गर्दै हाल ४ सय घरधुरीलाई शुद्ध पिउने पानी उपलब्ध गराइएको र ८ सय घरधुरीले सेवा लिन सक्ने जानकारी दिनुभयो ।

माडी एकीकृत समावेशी दीगो विकास परियोजनाका अध्यक्ष कृष्णराज अधिकारीको अध्यक्षतामा कार्यक्रम सम्पन्न भएको हो।

माडी नगरपालिका वडा नं ८ का वडाध्यक्ष वीरेन्द्रबहादुर भण्डारी शुभकामना मन्तव्य व्यक्त गरेका थिए । कार्यक्रम परिजनाका इन्जिनियर सुर्य प्रजापतिले परियोजनाको प्राविधिक पक्षका बारेमा जानकारी दिनुभएको थियो भनेमाडी एकीकृत समावेशी दीगो विकास परियोजनाका सचिव गोबिन्द पन्तले आर्थिक पक्षबारे जानकारी गराउनुभएको थियो ।खानेपानी परियोजनाको निर्माण सम्पन्न गर्नको लागि माडी नगरपालिकाबाट ७५ लाख, स्थानीय उपभोक्ताबाट २५ लाख र बाँकी सहयोग डेनिस संस्थाबाट भएको थियो।