काठमाडौं साउन १८- नयाँ पार्टी दर्ताको तयारीमा रहेका नेता डा.धवलशम्सेर राणाले दुर्गा प्रसाईँलाई पक्राउ गरेकोप्रति आपत्ति जनाएका छन्। आज एक विज्ञप्ति जारी गर्दै प्रसाईँलाई तत्काल रिहाइ गर्न माग गरेका छन् ।

विज्ञप्तिमा भनिएको छ, ‘यही सन्दर्भमा विश्वव्यापी रूपमा स्थापित मानव अधिकार र संविधानप्रदत्त विचार एवं अभिव्यक्ति स्वतन्त्रताको हक प्रयोग गरेर अभिव्यक्ति दिएकै कारण राष्ट्रवादी नेता दुर्गा प्रसाईँलाई सरकारले हिजो साउन १७ गते राति उहाँको निवासबाट पक्राउ गर्नु निन्दनीय छ ।’

उनले आलोचना, फरक मत, मत–अभिमत लोकतान्त्रिक पद्धतिका आधारस्तम्भ भएको उल्लेख गरेका छन्। विज्ञप्तिमा अगाडि भनिएको छ, ‘नागरिकप्रति सरकारको जवाफदेहिता, प्रजातान्त्रिक सन्तुलन र समाजको उन्नति–प्रगतिका लागिसमेत विचार एवं अभिव्यक्ति स्वतन्त्रता आधारभूत छन्। सरकारको आलोचना गर्नै नपाइने हो भने, त्यस्तो शासन प्रणाली लोकतान्त्रिक रहन सक्दैन ।’ प्रसाईँलाई हिजो राती प्रहरीले घरबाटै पक्राउ गरेको थियो ।