चितवन,मंसिर १७- यातायात व्यवस्था कार्यालय, भरतपुरले आफ्नो सबै सेवा पुनः सुरु गरेको छ । गत भदौमा भएको जेन्जी आन्दोलनका क्रममा कार्यालयमा भएको तोडफोड र आगजनीका कारण कार्यलयबाट हुने केही सेवा ठप्प भएको थियो । कार्यालयका सूचना अधिकारी ज्ञानबहादुर बोगटीले जानकारी दिए अनुसार, कार्यालयले आफ्नो भौतिक संरचना र आवश्यक कागजातको व्यवस्था पूरा गरेपछि सेवा पुनः सञ्चालनमा ल्याएको हो । उहाँले भन्नुभयो, “हामीले यहाँबाट हुने सबै सेवा हप्ता १० दिन अघि नै तयार पारेका थियौं, तर विभागसँगको समन्वयको कारण अनलाइन तथा प्रत्यक्ष सेवामा १३ गतेदेखि लाइसेन्स नविकरण र आजबाट नयाँ लाइसेन्सको बायोमेट्रिक सेवा मात्र सुरु भएको हो । ब्लु बुक नविकरण लगायतका केही सेवा पहिलेदेखि नै सुचारु थिए । ” बोगटीले थप्नुभयोे, “हिँजो मात्रै टायल परिक्षणका लागि विगतमा फाराम भरेका ४५ मध्ये ७ जनाले मात्र सहभागी भएका थिए । अर्को हप्ता टायलको सेवा पनि सुरु हुने छ ।” सेवा बन्द भएको बलोमा र सेवाग्राहीको म्याद थप नभएको कारणले धेरैले गुनासो आउने गरेको बोगटीले बताउनुभयो । उहाँले अहिले सेवा बन्द भएको बेलाको म्याद सकिएको छुट दिन नसकएको र यदि मन्त्रालयबाट परिपत्र आएमा कार्यालयले छुट दिन कुनै समस्या नभएको स्पष्ट पार्नुभयो । भिडभाड धेरै हुने यो कार्यालयमा दैनिक रूपमा ४००–५०० साना र २०० भन्दा बढी ठूला सवारी साधनका नविकरण लगायतका सेवाहरू प्रदान भइरहेका छन् । त्यस्तै, टायल र रि–टायलका पनि दैनिक ४–५ सय सेवाहरू उपलब्ध छन् । कार्यालयमा सेवा प्रवाह ढिलो भन्ने गुनासो आउने गर्दछ । कार्यालयले सेवा प्रवाहमा ढिलाइ हुनुको मुख्य कारण बाह्य लेखापढी, प्रक्रिया व्यवस्थापन र काउन्टरमा अन्य प्रक्रियागत जटिलता रहेको बोगटीले बताउनुभयो । उहाँका अनुसार कार्यालय व्यवस्थित हुँदै गएपछि यी समस्याहरू हट्ने अपेक्षा छ ।