काठमाडौँ । अविरल वर्षाका कारण आएको बाढी र पहिरोले देशका विभिन्न मुख्य राजमार्गहरू अवरुद्ध भएका छन्। साउन ४ गते बिहान ६:१० बजेसम्म प्राप्त विवरणअनुसार कोशी र बागमती प्रदेशका प्रमुख सडक खण्डहरू बाढी तथा पहिरोका कारण अवरुद्ध भएका हुन्।

यसैगरी सिन्धुपाल्चोकको भोटेकोशी गाउँपालिका ४ जिरोकिलो र वडा नम्बर २ कोदारीमा पहिरो जाँदा अरनिको राजमार्ग पूर्ण रूपमा ठप्प भएको छ। चितवनको इच्छाकामना गाउँपालिका ३ फिस्लिङमा पहिरो जाँदा पृथ्वीराजमार्ग पूर्ण रूपमा अवरुद्ध बनेको छ।

धादिङको बेनीघाट रोराङ १० तिमराङखानीमा पहिरो हटाएर पृथ्वी लोक मार्ग एकतर्फी खुलाइए पनि जोवाङ खोलामा पहिरो जाँदा सडक पूर्ण रूपमा अवरुद्ध भएको छ। रसुवाको गोसाइँकुण्ड ६ बोकेझुन्डामा पहिरो गए पनि पासाङ ल्हामु सडक खण्ड एकतर्फी रूपमा सञ्चालनमा ल्याइएको छ। अवरुद्ध सडकहरू खुलाउने प्रयास भइरहेको छ।