औषधी व्यवस्था विभागले देशमा रेबिज खोपको अभाव भएको विषयमा आधिकारिक जानकारी नआएको बताएको छ।
विभागकी निमित्त महानिर्देशक शिवानी खड्गीले सरकारी खरिद (प्रोक्योरमेन्ट) प्रक्रिया केही ढिलो हुँदा खोप आपूर्तिमा असर परेको हुनसक्ने बताइन्।
उनले हाल खरिदको प्रक्रिया अन्तिम चरणमा पुगेको जानकारी दिइन्। उनकाअनुसार अनुसार नेपालमा प्रयोग हुने अधिकांश खोप विदेशबाट आयात हुने गरेका छन् । स्वदेशमा पशुचिकित्सा (भेटेरिनरी) खोप मात्र उत्पादन हुने र मानव प्रयोगका सबै खोप आयातमै निर्भर रहेको उनले बताइन्।
उनले भनिन्, ‘रेबिज खोपको अभावको विषय अलिकति उठिरहेको छ। विभागमा अभाव रहेको भन्ने कुनै जानकारी आएको छैन । यो गभर्मेन्ट प्रोक्युरमेन्टको प्रक्रियामा अलि ढिलो भएको हो तर अब अहिले त लगभग भइसक्यो जस्तो लाग्छ ।’
खड्गीले खोप आवश्यक परेमा विभागले विशेष सिफारिसमार्फत उपलब्ध गराउने पनि जानकारी दिइन्।