काठमाण्डौ – पृथ्वी राजमार्गअन्तर्गत चितवनको मुग्लिङ–मलेखु सडक खण्डका चार पुल असारमा सञ्चालनमा ल्याउने तयारी भइरहेको छ । ती पुलको सामान्य बाहेकका काम सकिएका छन् ।
नागढुङ्गा–मुग्लिङ सडक आयोजना पश्चिम खण्ड कार्यालयका सूचना अधिकारी सचेन्द्र मिश्रका अनुसार खहरे खोला, चिरौँदी खोला, गोमती खोला र हुग्दी खोलाको पुल असारभित्र सञ्चालनमा ल्याउन लागिएको हो । ती पुलमध्ये कतिपयको सडकसँग जोड्ने बाटो बनाउन बाँकी छ ।
पुलको प्लास्टर, रङ रोगन, ट्राफिक सुरक्षालगायत सामान्य कामहरू बाँकी छन् । हुग्दी र चरौँदी खोलाको पुल निर्माणाधीन छ । ती पुलको भुईँ र पिल्लरको काम भइरहेको छ । अलकत्राको अभावमा रोकिएको कालोपत्रेको काम गर्ने तयारी गरिएको उहाँले बताउनुभयो ।
अलकत्राको भाउ बढेर आउन छोडेपछि यहाँ कालोपत्रे काम रोकिएको थियो । ढल निर्माण, रेलिङलगायतका काम भने भइरहेको आयोजनाले जनाएको छ । सडक निर्माणको काम ४३ प्रतिशत सम्पन्न भएको छ ।
यस खण्डमा ३८ दशमलव ८६ किलोमिटर सडक पर्दछ । मलेखु, बेनीघाट र मुग्लिन खण्डमा दुई किलोमिटर सडक छ लेनको बन्नेछ । रमाइलो डाँडा, कुरिनटार, फिस्लिङ, चुम्लिङ, मझीमटार, चरौँदी र विशालटार क्षेत्रका सात किलोमिटर सडक चार लेनको हुनेछ ।
सडकका विभिन्न क्षेत्रमा कालोपत्रेसँगै नाला बनाउने, पहिरो रोकथामका लागि संरचना निर्माण, भित्तो काट्ने, पर्खाल लगाउने, सडक सुरक्षा, पुल निर्माणलगायत काम बाँकी छ । यो सडक विश्व बैङ्कको सहयोगमा बनाउन लागिएको हो । काठमाण्डौ प्रवेश गर्ने र बाहिरिने मुख्य नाकाका रूपमा यो खण्ड रहेको छ ।