काठमाण्डाै – नेकपा (माओवादी केन्द्र) ले ’जनतासँग माओवादी मध्यपहाडी (पुष्पलाल लोकमार्ग) जनजागरण अभियान’ स्थगित गरेको छ ।

गोरखाको भीमसेन थापा गाउँपालिका–३ टारिफाँटमा बसेको माओवादीका उपलब्ध पदाधिकारीहरूको आकस्मिक बैठकले काठमाण्डाैसहित देशका विभिन्न ठाउँमा ‘जेन–जी’ पुस्ताको प्रदर्शन र देशको समसामयिक अवस्थालाई ख्याल गर्दै अभियान स्थगित गरेको हो ।

बैठकले भोलि काठमाण्डाैमा पूर्ण पदाधिकारी बैठक बोलाउने निर्णय गरेको छ । बैठकले ‘जेन जी’ ले उठाएका सामाजिक सञ्जालमाथिको प्रतिबन्ध हटाउने र भ्रष्टाचारविरुद्धका मागहरूलाई तत्काल सम्बोधन गर्न तथा स्थिति थप बिग्रिन नदिन जिम्मेवारीपूर्वक कदम चाल्न सरकारसमक्ष माग गरेको छ ।

बैठकपछि प्रेस नोट जारी गर्दै अध्यक्ष पुष्पकमल दाहाल प्रचण्डले ‘जेन जी’ ले उठाएका सामाजिक सञ्जालमाथिको प्रतिबन्ध हटाउन र भ्रष्टाचारविरुद्धका मागहरूलाई तत्काल सम्बोधन गर्न माग गर्नुभएको छ ।