महिला तथा सामाजिक समितिका सभापति किरणकुमार साहले आधुनिक समाज, सभ्यता संस्कृतिमा बहुविवाह सोच्न पनि नसकिने र त्यस्तो कानून आए त्यसको विरोधमा अग्रपंक्तिमा उभिने बताएका छन्।

बुधवार काठमाडौंमा आयोजित बालबालिका सम्बन्धी संशोधन ऐन, २०७५ माथिको छलफल कार्यक्रममा यस्तो बताएका हुन्। उनले अहिलेको सरकारले बहुविवाहसम्बन्धी त्यस्तो किसिमको कठोर नीति लियो भने सत्ता गुमाउनुपर्ने बताए।

हाल नेपालमा ५१ प्रतिशत महिला रहेको उल्लेख गर्दै उनले महिला सडकमा आए भने कानून ल्याउनेको हालत के हुन्छ ? भन्दै प्रश्न गरे। उनले बहुविवाहविरुद्धको आन्दोलनमा आफू अग्रपंक्तिमा उभिने प्रतिबद्धता जनाए। यस्तो किसिमको कानून कुनै हालतमा नआउने र आउन पनि नदिने उनको भनाइ छ।

साहले भने, ‘अहिलेको आधुनिक समाजमा बहुविवाहको कल्पना पनि गर्न सकिन्न। यदि सरकारले त्यस्तो नीति लियो भने सत्ताबाट हात धुनुपर्ने स्थिति आउन सक्छ। नेपालमा ५१ प्रतिशत महिला दिदीबहिनी हुनुहुन्छ। उहाँहरू सडकमा आए ती कानून ल्याउनेको हालत के हुन्छ? त्यसको अग्रपंक्तिमा पार्टी, जाति छोडेर आन्दोलनमा उत्रिनपर्छ भने पनि बहुविवाहविरुद्ध उभिन तयार छु।’

उनले बालविवाहको विरुद्धमा पनि दृढ संकल्पित रहेको बताए।