बेपत्ता पारिएका व्यक्तिहरूको सम्झनामा शुक्रबार विश्व बेपत्ता विरुद्धको दिवस मनाइँदैछ।
बलपूर्वक बेपत्ता पारिएका व्यक्तिको सम्झनामा सन् १९८१ देखि संयुक्त राष्ट्रसंघ र एम्नेष्टी इन्टरनेसनलको सक्रिय भूमिकामा हरेक वर्षको अगस्त ३० तारिखमा विश्वभर यो दिवस मनाउन थालिएको हो। दिवस मनाउने क्रमको सुरुआत ल्याटिन अमेरिकी राष्ट्र कोष्टारिकाबाट भएको हो।
नेपालमा विगतमा भएको १० वर्षे लामो सशस्त्र द्वन्द्वका क्रममा सुरक्षा फौज र माओवादीबाट ठूलो संख्यामा नागरिक बेपत्ता पारिएका थिए। सशस्त्र द्वन्द्वपछि शान्ति सम्झौता भएको लामो समय बितिसक्दा पनि राज्य र विद्रोही पक्षबाट बेपत्ता पारिएका व्यक्तिको वास्तविकता अझै सार्वजनिक भएको छैन। बेपत्ता पारिएका व्यक्तिको छानबिन आयोगमा ३ हजार २८८ उजुरी परेका छन् ।
दिवसका अवसरमा राष्ट्रिय मानवअधिकार आयोगले विस्तृत शान्ति सम्झौताको १८ वर्ष पूरा हुन लाग्दा पनि सशस्त्र द्वन्द्वमा बलपूर्वक बेपत्ता पारिएको अवस्था सार्वजनिक हुन नसकेको र न्यायको पर्खाइमा रहिरहेका पीडितको अवस्थाप्रति ध्यानाकर्षण भएको जनाएको छ।
आज प्रेस विज्ञप्ति जारी गर्दै आयोगले बेपत्ता पारिएका व्यक्तिको अवस्था सार्वजनिक गरी न्यायको अधिकार सुनिश्चत गर्न माग गरेको छ। आयोगमा परेका उजुरीका आधारमा बेपत्ता व्यक्तिको अवस्था सार्वजनिक गर्न सरकारलाई २०५ वटा सिफारिस गरेको र तीनको कार्यान्वयन निराशाजनक रहेको विज्ञप्तिमा उल्लेख छ।
अझै ७९० वटा उजुरी विचाराधीन रहेको आयोगका सहसचिव एवं प्रवक्ता टीकाराम पोखरेलले जानकारी दिए।