काठमाडौँ संसद्मा आफ्नाबारे प्रश्न उठेपछि सभामुख डोलप्रसाद अर्यालले ध्यानाकर्षण भएको प्रतिक्रिया दिएका छन्। प्रतिनिधिसभाको बुधबारको बैठकमा नेपाली कांग्रेसका सांसद चन्द्रमोहन यादवले सीमा विवादबारे प्रधानमन्त्री बालेन्द्र शाहको अभिव्यक्तिमाथि ‘रुलिङ’ नगरेको भनी सभामुख अर्यालमाथि नै प्रश्न उठाए।
‘सभामुख महोदय, हाम्रो गरिमामय जो सामुन्ने कुर्सीमा बस्नु भन्दा पहिला एउटा पार्टीसँग सम्बन्धित हुनुहुन्थ्यो। के सभामुख महोदय अहिलेसम्म त्यो पहिलेको रास्वपा पार्टी थियो यहाँको त्योसँगको नाभी काट्न सक्नुभएको छैन कि क्या हो?’
यादवले प्रधानमन्त्रीले नेपाल–भारत सीमाका सम्बन्धमा दिएको अभिव्यक्तिलेअन्तर्राष्ट्रिय स्तरमा देशको छविमा आँच पुर्याएको बताए । यादवको भनाइ लगत्तै सत्तापक्षका सांसदले नियमापत्ति गरे। रास्वपाका सांसद गणेश कार्कीले प्रतिनिधिसभा नियमावलीको नियम २१ को ‘ख’ मा सभामुखले पद अनुकुलको आचरण गरेको छैन भन्ने प्रस्तावमा बाहेक सभामुखको आलोचना गर्न नपाइने प्रावधान राखेको स्मरण गराए। त्यसपछि सभामुख अर्यालले यो विषयमा ध्यानाकर्षण भएको प्रतिक्रिया दिए।
‘आजै माननीय सदस्य चन्द्रमोहन यादवद्वारा बोलिएको शब्दप्रति मेरो ध्यानाकर्षण भएको छ। माननीय सदस्यलाई हाम्रो नियमावलीको नियम २१ तर्फ ध्यानाकर्षण गराउँछु’, उनले भने। प्रतिनिधिसभा नियमावलीको नियम २१ (ख) मा भनिएको छ, ‘सभामुखले पद अनुकुल आचरण गरेको छैन भन्ने प्रस्तावको छलफलको क्रममा बाहेक सभामुखको आचरणको आलोचना गर्न नहुने।’