माडी, चितवन जेठ २३ । दिवाकर स्मृति माध्यमिक विद्यालय, माडी–५ रमाइलोडाँडामा जया देवी पौडेल लामिछानेको अध्यक्षतामा ७ सदस्यीय नयाँ विद्यालय व्यवस्थापन समिति गठन गरिएको छ।माडी नगरपालिकाको पत्रानुसार केही नेपाल ऐनलाई संशोधन गर्ने अध्यादेश, २०८३ बमोजिम विद्यालय व्यवस्थापन समितिको पुनर्गठन गरिएको विद्यालयले जनाएको छ।
नवगठित समितिमा सदस्यका रूपमा मञ्जु आचार्य, मुक्ति प्रसाद बस्याल तथा एकराज चापागाईं चयन हुनुभएको छ। यसैगरी, पदेन सदस्यमा वडाध्यक्ष गणेश प्रसाद घताने र शिक्षक प्रतिनिधिका रूपमा जनकराज भुषाल रहनुभएको छ। समितिको सदस्य–सचिवको जिम्मेवारी प्रधानाध्यापक बल बहादुर श्रेष्ठलाई प्रदान गरिएको छ।
नयाँ व्यवस्थापन समिति गठन भएसँगै विद्यालयको शैक्षिक, प्रशासनिक तथा व्यवस्थापकीय गुणस्तर अभिवृद्धि हुने विश्वास गरिएको छ। विद्यालयको समग्र विकास, शैक्षिक सुधार तथा प्रभावकारी व्यवस्थापनमा समितिले महत्वपूर्ण भूमिका निर्वाह गर्ने अपेक्षा गरिएको छ।