यो वर्षको माध्यमिक शिक्षा परीक्षा (एसइई) दिने विद्यार्थीको संख्या बढेको छ। राष्ट्रिय परीक्षा बोर्डले दिएको जानकारीअनुसार गत वर्षको तुलनामा यसपाली झण्डै ११ हजार परीक्षार्थीको संख्या बढेको छ।
परीक्षा बोर्ड, परीक्षा नियन्त्रण कार्यालय कक्षा-१० का सूचना अधिकारी लक्ष्मी मरासिनीले यो वर्षको एसइई परीक्षामा नियमिततर्फ, एनजी (फेल भएका) र पुराना गरी पाँच लाख ९ हजार ९६१ जना विद्यार्थी सहभागी हुने जानकारी दिइन्।
गत वर्ष एसइई परीक्षामा बोर्डले परीक्षामा नियमिततर्फ ४ लाख ३१ हजार ४६६ र ग्रेड वृद्धितर्फ ६७ हजार ७१५ गरी कुल ४ लाख ९९ हजार १८३ विद्यार्थी सहभागी भएको जानकारी दिएको थियो।
तत्काली परीक्षा बोर्डका अध्यक्ष महाश्रम शर्माका अनुसार नियमित परीक्षमा तर्फ चार लाख ३८ हजार ८९६ मध्ये नियमिततर्फ सहभागी चार लाख ३८ हजार ८९६ परीक्षार्थीमध्ये ३.६ जीपीएदेखि ४ जीपीएसम्म ल्याउने ४८ हजार १७७ जना, ३.२ जीपीएदेखि ३.६ जीपीए ल्याउने ८१ हजार ३८५ जना र २.८ जीपीएदेखि ३.२ जीपीए ल्याउने ८९ हजार १२४ जना परीक्षार्थी थिए।
त्यसैगरी २.४ जीपीएदेखि २.८ जीपीएसम्म ल्याउने ४८ हजार ४७९ जना, २ जीपीएदेखि २.४ जीपीए ल्याउने चार हजार १३६ जना र १.६ देखि २ जीपीए ल्याउने आठजना परीक्षार्थी छन्। २०८१ को एसइई परीक्षामा ६१.८१ प्रतिशत विद्यार्थी पास भए।
उक्त हिसाबले गत वर्षभन्दा यसपालीको एसइई परीक्षामा १० हजार ७७८ जना बढेको देखिन्छ। यो वर्षको एसइई यही चैत १९ गतेदेखि २९ गतेसम्म सञ्चालन हुँदै छ।