अमेरिकाले डाइभर्सिटी भिसा (डीभी) लटरी कार्यक्रम तत्कालका लागि स्थगित गरेको छ । अमेरिकी होमल्याण्ड सेक्युरिटी सेक्रेटरी क्रिस्टी नोएमले राष्ट्रपति डोनाल्ड ट्रम्पको निर्देशनमा डाइभर्सिटी भिसा लटरी कार्यक्रम तत्कालका लागि स्थगित गरिएको घोषणा गरेकी छन् । ब्राउन विश्वविद्यालयमा भएको गोलीकाण्डका आशंकित व्यक्ति यही कार्यक्रममार्फत अमेरिका प्रवेश गरेको खुलेपछि कार्यक्रम रोक्ने निर्णय लिइएको हो ।
नोएमका अनुसार आशंकित व्यक्ति सन् २०१७ मा डाइभर्सिटी भिसा लटरी कार्यक्रमबाट अमेरिका पुगेका थिए । उनी ४८ वर्षीय पोर्चुगिज नागरिक हुन्, जो करिब दुई दशकअघि ब्राउन विश्वविद्यालयका विद्यार्थी पनि थिए । पछि उनले यही कार्यक्रमअन्तर्गत स्थायी बसोबास अनुमति (ग्रिन कार्ड) प्राप्त गरेका थिए । यस्ता जघन्य अपराध गर्ने व्यक्ति हाम्रो देशमा प्रवेश गर्नु नै हुँदैनथ्यो, नोएमले भनिन् । राष्ट्रपति ट्रम्पको निर्देशनअनुसार अमेरिकी नागरिकता तथा आप्रवासन सेवालाई डीभी कार्यक्रम रोक्न निर्देशन दिइएको उनले जानकारी दिएकी छन् । गत साता ब्राउन विश्वविद्यालयमा भएको सामूहिक गोलीकाण्डमा दुई जनाको मृत्यु हुनुका साथै नौ जना घाइते भएका थिए । घटनापछि फरार रहेका आशंकित व्यक्ति बिहीबार न्यू ह्याम्पसायर राज्यको एक भण्डारण केन्द्रमा आत्मघाती गोली प्रहारबाट मृत अवस्थामा फेला परेका छन् ।