प्रधानमन्त्री के.पी. शर्मा ओलीले ‘चितवन राष्ट्रिय निकुञ्जभित्र बिजुलीको भूमिगत केबल राख्नका लागि आवश्यक काम पुरा गर्न’ संघीय उर्जामन्त्री र वनमन्त्रीलाई निर्देशन दिनुभएको छ ।
प्रधानमन्त्रीसंग भेटसम्वादका लागि काठमाडौं पुगेका माडीका मेयर र उपमेयरसहित माडी एवं चितवनका राजनैतिक अगुवाहरुसंगको बैठकमा प्रधानमन्त्री ओलीले ‘भूमिगत केबुल बिछ्याउने अनुमती दिन’ वनमन्त्री ऐनबहादुर शाहीलाई र ‘काम अगाडि बढाउन’ उर्जामन्त्री दिपक खड्कालाई निर्देशन गर्नुभएको हो ।
प्रधानमन्त्रीसंग भेट्नुअघि माडीको प्रतिनिधिमण्डलले राष्ट्रिय निकुञ्ज तथा वन्यजन्तु संरक्षण विभागका महानिर्देशक रामचन्द्र कँडेलसंग गरेको छुट्टै भेटमा महानिर्देशक कँडेलले ‘हाल केबुल रहेकै स्थान र रुटबाट नयाँ केबुल लैजान सहमती दिइने’ बताउनुभएको थियो ।
त्यस्तै, माडीको प्रतिनिधिमण्डलले फरक भेटमा नेपाल विध्युत प्राधिकरणका उपनिर्देशक मनोज सिलवालसंग गरेको परामर्शमा उपनिर्देशक सिलवालले ‘भूमिगत केबुल राख्न बजेट विनियोजन रहेकाले वन मन्त्रालयबाट सहमती पाए काम गर्न सकिने’ बताउनुभएको थियो । प्रतिनिधिमण्डलले नेपाली काँग्रेसका सभापति शेरबहादुर देउवासंग समेत भेट गरी माडीको समस्याबारे अवगत गराएको थियो ।
यसपटक प्रधानमन्त्रीको तहबाटै भूमिगत केबुल राख्ने काम अगाडि बढाउन निर्देशन भएसंगै अब सो काम अगाडि बढ्ने आशा बढेको छ । निकुञ्जभित्र पटक पटक केबुल फल्ट भइरहेसंगै बिचमा बैंकल्पिक केबुल राख्ने प्रक्रिया अगाडि बढेपनि ई.आई.ए.को प्रक्रिया अन्तरगत युनेस्कोको सहमती खोजिएसंगै हाल ठेक्का खारेज भएको अवस्था छ ।
Advertisement